Presidenti shpreson që BE të hapë negociatat me Shqipërinë në qershor

Presidenti shpreson që BE të hapë negociatat me Shqipërinë në qershor

Ndërsa opozita ka futur vendin në krizë politike duke djegur mandatet e deputetëve të saj, nga Gjermania, Presidenti i Republikës, shprehu sot shpresën se në qershor, Bashkimi Europian do të vendosë për çeljen e negociatave me Shqipërinë për anëtarësim.

“Ne shpresojmë se edhe me mbështetjen e paçmuar të Gjermanisë dhe me vullnetin e të gjithë vendeve anëtare, të jemi të gatshëm të çelim negociatat me BE-në qershorin e 2019-s” tha presidenti gjatë një fjalimi të gjatë që mbajti në Konferencën Vjetore të Ndërmarrjeve të Vogla dhe të Mesme gjermane në Berlin, ku ishte si i “Ftuar Nderi”.

Në prani të shumë bizneseve, z.Ilir Meta gjeti rastin të ftonte bizneset gjermane për investimeve në sektorin e turizmit dhe energjetikës në Shqipëri.

Apelet e Presidentit vijnë në një periudhë të vështirë për politikën shqiptare. Opozita e bashkuar ku dominojnë Partia Demokratike e Lulzim Bashës dhe Lëvizja Socialiste për Integrim e bashkëshortes së Metës, Monika Kryemadhi, kanë shpallur vendimin për të djegur mandatet e të gjithë deputetëve të tyre.

Në këtë mënyrë është hera e parë në 28 vjet pas rikthimit të demokracisë që Shqipëria përballet me mungesë pluralizmi politik, të paktën në Parlament. /ibna/